قصيدة الحجاب

يالي سألتيني على الحجــــــــاب **** وقلتيلي علاه ما تكتبش عليــــــه
نقولك بنت الناس غلطي فاــــباب **** أنا ماني عــــالم وماني فقــيـــــه
نقولك برك الحق باه مانكونش كذاب ****ولا شيطان أخرس ونسكت عليه
نشدك من الباب ونوصلك للـــــباب **** والباقي عليك نتــــيا لي تكمليـه
أتوجهــي لله وأفتحــي لكتـــــــاب **** أقراي القرآن وحــــاولي تفهميـــه
الذكر اليسير الساهل ما يصعــاب **** وربي سبحـــــانو وحدو اسأليـــــه
ورايي أنا ما تديريلوش حسـاب **** وحتى راي الناس ما تحوسيش عليـه
مـــا دام نزل الحــــكم الصـــواب **** وربي سبحـــــــــــــــانو تكلم فيــــه
في سورة النور وسورة الأحـــزاب **** ربي الخالــــــق يأمر في نبيـــــــــه
يستر بــــناتو وزواجو بالحجـــــاب **** ويستر المومنات صــــلى الله عليـــه
لبنادم كان حاب ولا ماشي حــــاب **** هنايا الأمر مـاهوش في يديـــــــه
الي قالها ربي نديرها بالترحـــــاب **** ربي قالك ديريه أمالا غير ديريـــــه
علا خاطر هو الرحيم الــتــــــواب **** والي يرحمــــــو راه يتوب عليــــــــــه
ويلا تاب عليه يفتــحلو لبــــــــواب **** باش يربح هنـــــــــا ويربح لهيــــــه
ولوكان اديريه ايمانا واحتســــــاب **** وبنية صادقة او خالــــــصة ليـــــــه
اتأكدي بلي رايح يجيك شبـــــــاب **** وما كانش الوحدة الي ندمت عليه
صح فالأول راح عليك يصعــــاب **** يجي ليك بليس يلعنو ويخــــــزيــــــــه
يقولك مازالك في عز الشبــــاب **** هاذ الزين كامل راكي رايحة تخبيه؟
الإيمان فالقلب وانت راكي صــواب **روحي شوفي كيفاه راهم يمرمدو فيه
زعما من برى راهم دايرات حجاب ****والي مخبي غير ربي الي يعلم بيـه
قوليلو يا بليس كلامــك شبــــــاب **** مليح الي يطيع ربي وما يعصــــــيه
لكن لبنادم خطـــــــاء تـــــــــواب **** لما يعمل السوء مالازمش يجهر بـيه
والي يستر روحوا ويعمل حســـاب **** لهاذاك النهار لما نروحوا لــــــيه
ربي يسترو في يوم الحســــــاب **** يحاسبو والناس كامل بعاد عليــــــه
خير ملي يفضحو قدام لحبـــــــاب **** خاوتو واصحابو واهلو واماليــــــــه
ويقراو كامل واش كاين فالكــتاب **** الي ربي وحدو هو العالم بيــــــــــه
يالي سألتيني على الحجــــــــاب ****هذا هو الشي الي قدرت عليـــــــه
ويلا حتى اللهنا مالقيتيش جــواب **** لجواب تلقايه...نهار اتديــــريــــــــه
آمين يا رب العالمين